Alla Itolae Nusa 28
Eleki Isake ikoti Yakupe eleki Iriluke misete etei kai ibeteke lokoi be, “Akai bina bei tamata Kanane yake.
Aakneka kena akeu lopai Padan-Arame loko upumu Betuele, kai akai bina sae bei mememu Labane eni nanaru.
Alla rebe Ikbasa titinai Iriluke misete ete ale kena akaije noma kai Iono amu anubua boka titinai eti esi ono sukua boka rebe tatike pine esi ono bangsa toini.
TUHANE Iriluke misete ete ale kai amu anubuaru lupe rebe Irilukele ete Abrahame, leke arueke tapele rebe arue kenae meije rebe Alla Irilukele ete Abrahame.”
Ele mere Isake isuka kena Yakupe ikeu lopai Padane-Arame loko Labane, Betuele tamata Arame eni nanare. Labane mere Isake kai Yakupe lua inasi Ripka betai.
Kena Esau irekwa be Isake ikotie loko Alla leke Iriluke misete ete Yakupe kai isuka kena Yakupe ikeu lori Padan-Arame kena inikwa bina bei ete mere, kai kena ikotie loko Alla leke Iriluke misete ete Yakupe ibeteke lokoi be ikai bina bei tamata Kanane Yake,
kai Esau irekwa be Yakupe ilene loko amai kai inai esi lepate hoko ikeu lori Padan-Arame peneka,
hoko Esau inati be amai Isake isuka bina tamata Kanane mo.
Ele mere hoko ikeu loko Ismaele, Abrahame Eni nanere eleki ikai kai Ismaele eni nanae Mahalate, Nebayote eni betai muli.
Yakupe ikeleke bei me Berseba lori kota Harane
Eleki kena iroma otoi sae me, intulu ete mere le lemataije suni peneka. Irana batu inai sae ete mere kena ilukue uluije, eleki intulu.
Eleki ikmani be iselu elane nanuke ekele bei tapele roma ndete lanite. Eleki iselu malekataru esi rulu kai sa lokole.
TUHANE Ikele me leine kai Ibeteke be, “Au meije TUHANE, upumu Abrahame kai amamu Isake esi Alla. Tapele rebe antulu kenae meije, Au rilukele ete ale kai amu anubuaru.
Amu anubuaru esi boka lupe lopone kai esi lei keholi, kai baue ale kai amu anubuaru Au riluke misete ete pusue tamata mei nusa.
Lene mimise! Akeu loko etika neka Au raka ale, kai Au leuke ale suike lomei tapele meije le Au hleke ale mo eti Au ono saisa rebe Au taluke ete alere.”
Yakupe ibetu, ilepa ete ruai be, “TUHANE Imei kena otoi meije, po uke auku rekwaIje meije.”
Hoko rilai eleki ibeteke be, “Otoi meije entau kuate. Otoi meije Alla eni luma kai lalane lolete surgare.”
Eleki kena beleite irana batu rebe ilukue uluije kenare eleki ielekele kena lisi. Kai isoba batu mere kena leite saitune.
Eleki iono otoi mere esi nane Betele. Otoi mere akmenare esi nane Luse.
Eleki ila loko Tuhane be, “Sepo kena au keu meije pine TUHANE Araka au, kai Ariluke manane kena au kanele kai pakiane kena au pakele,
eti au leu suike loko amaku eni luma kena misete, hoko auku Alla kena TUHANE Ale.
Kai pusue yelu rebe Arilukele ete aure, au riluke beie ete Ale sabokae lara butu esa. Kai batu rebe au elekele kena lisi meije eono otoi kena tatu loko Ale.